Ladko Ko Patane Ke Tarike

Kisi ladke ko patana aap ladkiyon ke liye zyaada badi baat nahi hai. Agar kisi ladke ko pata chal jaaye ki aap use chahti hain to wo khud hi dum hilaate hilaate aapke peeche aa jayega. Ek to ladkon ko uchit ladki nahi milti – aisa sunhera avsar wo kadachit nahi chhodenge. Fir bhi kuch doodh ke dhoole ladke honge jo aap ki bhavnaon ko samajhne mein waqt lagate ho. Tab aap ke paas ek hi raasta hai – Dhongibaba ke sujhaav. Chalo aage padhiye ladkon ko patane ke 13 tarike.

1. Ladkon ko hasmukh ladkiyan badi pasand aati hain. Tum uske ghatiya se ghatiya baat par bhi zor-zor se haso. Wo bahut khush ho jayega aur tumhe chahne lagega.

2. Tum jis ladke ko chahti ho uske doston ke saath thodi flirting kiya karo. Tum jise chahti ho use bilkul bhav mat do. Wo jalan se aag-baboola ho jayega. Tumhare prem mein wo joru ka ghulam ban jayega.

3. Jis ladke ko tum chahte ho, uske doston se uske baare mein poochti raha karo. Par khud usse kabhi baat mat karna. Wo khud tumse baat karne ko vyakul ho jayega. Fir tum use apne prem jaal mein faans lena.

4. Use jab bhi milo to hamesha akele hi mila karo. Aur uski taarif kar diya karo – kabhi chehre ki, kabhi kapdon ki to kabhi shareer ki. Ek din keh dena, aaj to bade mustande lag rahe ho. Wo paagal hokar tumhare kadmon mein gir padega.

5. Jise tum chahti ho uski behen se dosti kar lo. Aur uski behen se hamesha meethi-meethi baatein karke uske ghar aana jaana chalu kar do. Baaton baaton mein bata dena use ki tum uske bhai ko pasand karti ho. Baaki ka wo khud hi sambhal legi.

6. Ladkon ko sharmeeli ladkiyan bahut achhi lagti hain isiliye jab bhi usse milo to ekdum sharmeela pan dikhao. Wo baat karne ki koshish kare to sharma kar bhaag jao. Kuch aur kahe to keh do ki mujhe sharam aati hai. Uska dil pighal jaayega.

7. Jab bhi ghoomne jao aur paise kharch karne ka waqt aaye to tum bhi paise kharch kiya karo. Ladkon ko ye lagta hai ki agar unke jeevan mein koi ladki aayi to jeb dheeli ho jayegi. Tum kharcha karogi to wo khush ho jayega aur tumhe chahne lagega. Ek baar pyaar ho gaya fir tum batwa ghar bhool jaana – sab chalta hai.

8. Use boldo ki uski shakal-soorat aur baal kisi filmi hero se milte hain. Ye jhooti baatein bolte waqt hasna mat. Phir kya, wo is kadar tumhare liye paagal ho jaayega ki tum soch bhi nahi sakti.

9. Uske doston se bolo ki tumhare peeche to ladkon ki line lagi hai lekin tum shayad us ladke ko pasand karti ho. Jab ye baat ghoom phirkar us ladke tak pahunchegi to ismein uske doston ne itna mirch masala laga diya hoga ki tumhara kaam ban jaayega.

10. Agar uske paas gaadi ya bike hai, to use kaho ki tumhe thoda ghumane le jaaye. Kabhi lift maang liya karo. Jhoot-moot ka anand dikhao. Baaton baaton mein use apni mohmaya ke jaal mein fasa lo.

11. Use jis khel men ruchi hai tum bhi wahi khel khelo. Aue khelte samay ki tasveeren apne facebook mein post kardo. Jab tumhe hazaaron ladkon ke comments aayenge to wo khud hi tumhare baare mein soch soch kar tumhe apna dil de baithega.

12. Usse har choti-choti baaton ke liye salaah-mashwara liya karo. Wo khud ko khoob samajhdaar samjhega aur tum uski isi bewakoofi ka faayda uthakar usse meethi meethi baatein karti rehna.

13. Aajkal ke zyaadatar ladke to pyaar ke naam par sirf ladkiyon ke dilon se khelna hi jaante hain. Isiliye hum to yahi kahenge, ladkiyon, in dushton se jitna door hi rahogi utni zyaada sukhi rahogi. Lekin fir bhi honhaar ladke to hote hain hamari tarah. Unhe pehchaan lo aur prem jeevan ka anand uthao.

Posted in: Ladko Ko Patane Ke Tarike